Ukraina Nazirler şurası aprel 20-de olıp keçken toplaşuvında Vaqtınca işğal etilgen topraqlar ve memleket içinde köçip kelgenlerniñ meseleleri boyunca Nazirlikni qurmağa qarar aldı.
Ukraina devlet mülki fonduna nazirlik yerleşecek binanı teklif etmege avale etildi.
Yañı hızmetniñ reberi Donbassnı ğayrıdan tiklev meseleleri devlet agentliginiñ sabıq yolbaşçısı Vadim Çernış oldı.
Aprel 14-te Yuqarı Rada sabıq spiker Volodımı Groysman yolbaşçılığında ukrain ükümetiniñ yañı erkânını belgiledi.
2014 senesiniñ başında Rusiye Qırımnı işğal etken soñ Ukraina prezidentiniñ Qırımdaki daimiy temsilciligi Hersonda, Baş prokuratura yanında Qırım Muhtar Cumhuriyetiniñ prokuraturası Kyivde, Ukraina ükümeti yanında Qırım ve Aqyar meselelerinden devlet hızmeti, Ukraina İçki işler nazirliginiñ Qırım Muhtar Cumhuriyetinde Baş idaresi Odessada çalışalar. Ukraina prezidentiniñ qırımtatar halqı işlerinden vekâletlisi Mustafa Cemilev ola.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
