Qırımtatar timsalleri yasaq etilmedi, dep aytıla Rusiye Adalet nazirliginiñ Qırım blogeri Zair Akadırovnıñ muracaatına bergen resmiy cevabında. Rusiye Adalet nazirliginden kelgen mektüp kopiyasını Qırımtatar Milliy Qurultayı Merkeziy saylav komissiyasınıñ reisi Zair Smedlâyev Facebookta aydınlattı.
«Semetdeşlerimizniñ diqqatına: qırımtatar timsalleri yasaq etilmedi! Qırımtatar bayrağı – qırımtatar halqınıñ tarihiy bayrağı ve bir de bir cemaat teşkilâtına ait degildir. Onı yasaq etmek – halqımıznıñ, onıñ tarihı, medeniyeti ve yaşamasını yasaq etmek demektir!», – dep qayd etti o.
Zair Smedlâyevniñ bildirgenine köre, Qırımda keçirilgen futbol yarışlarında qırımtatar milliy bayrağını qullanmağa yasaq etecek ediler, bu sebepten mezkür muracaat Rusiye Adalet nazirligine berildi.
«Futbol yarışlarında maña milliy bayrağımıznı qullanmağa yasaq etecek oldılar, Zair Akadırov Rusiye Adalet nazirligine muracaat etti, böyle bir cevap aldı. Söz sırası, bu sebepten meni Qurman rayonı prokuraturasına davet etmek kerekler», – dep qayd etti Qurultay MSK reisi.
Rusiye Adalet nazirliginiñ cevabında 2016 senesi fevral 9 künü dep yazıla, amma cevap aprel 20-de aydınlatıldı.
2015 senesi noyabr ayında politsiya qırımtatar taqımları arasında keçirilgen Amet-Han Sultan mukâfatı futbol yarışına qırımtatar bayraqlarını almağa izin bermegen edi.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa. /p>
