Link açıqlığı

Adliyeci: Qırımda «fevral 26 işi» taqiqatı onıñ iştirakçileriniñ apis cezalarını uzatacaq ola


Nikolay Polozov

Qırımda «fevral 26 işi» taqiqatı bu işniñ iştirakçileriniñ apis cezalarını uzatmağa muracaat etecek, dep bildire Rusiye adliyecisi Nikolay Polozov. O, Meclis reisiniñ muavini Ahtem Çiygoznıñ adliyecisi ola.

Polozovnıñ bildirgenine köre, taqiqat aprel 21-de mahkemede bu talapnı seslendirecek.

«İşni baqqan taqiqat yarın Ahtem Çiygoz, Ali Asanov ve Mustafa Degermenciniñ apis cezalarını uzatmaq talabınen muracaat etecek», – dep yazdı Polozov aprel 20-de Facebookta.

Onıñ qayd etkenine köre, al-azırda «qabaatlanğan ve olarnıñ adliyecileri iş malümatını ögreneler».

Adliyeci mahkemeci Galina Redkonıñ qanunsız qararları aqqında hatırlattı.

«Ahtem Çiygoz Rusiye Taqiqat komitetiniñ reisi A.İ. Bastrıkinge muracaat etip, Qırım mahkemecisi G.V.Redko yapqan cinayetleri aqqında bildirdi. İçki/tışqı duşmanlarnıñ qıdırılması ve siyasiy işlerniñ uydurılması sırasında mahkemeci G.V.Redkonıñ qanunsız faaliyetini taqiq etmege başlaycaqlarını tüşünmeyim», – dep qayd etti Polozov.

Rusiye kontrol etken Qırım Yüksek mahkemesi aprel 14-te mahkemeci Galina Redkonıñ mart 4-te «fevral 26 işiniñ» iştirakçileri Ahtem Çiygoz, Ali Asanov ve Mustafa Degermenciniñ apis cezalarınıñ qanunsız uzatılması aqqında çıqarğan ekinci qararını lâğu etti.

Qırım Rusiye tarafından işğal etilgen soñ yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksenov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahkeme etmege başladılar.

Vaqialar 2014 senesi fevral 26-da olıp keçken edi. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi.

Fevral 15-te Qırımnıñ Yuqarı mahkemesi bu işni tekrar taqiq etilmesine yollamağa qarar aldı.

Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG