Link açıqlığı

Ukraina Qırımda Meclis yasaqlanmasını takbih etecek PACE rezolütsiyasına ümüt besley – Logvinskiy


Avropa Şurası Parlament assambleyası baar sessiyasında Qırımda Qırımtatar Milliy Meclisi faaliyetiniñ yasaqlanmasını takbih etecek rezolütsiyanı qabul ete bile, dep bildire Ukraina Yuqarı Radasınıñ deputatı, ukrain eyyetiniñ azası Georgiy Logvinskiy.

«PACE ekstremist bir teşkilât olaraq Meclis yasaqlanmasını takbih etsin ve bu areketlerni halqara qaidelerniñ bozulması ve qırımtatarlarnıñ aq-uquqları bozulmasınıñ ifadesi olaraq tanısın dep, küreşecekmiz», – dep yazdı Logvinskiy Facebookta.

Onıñ aytqanına köre, Rusiye Avropa Şurası Nizamnamesi ve Avropa Şurası immunitetleri Baş añlaşmasında qayd etilgen vazifelerinden vazgeçti, PACEniñ Rusiyede mahküm etilgen Ukraina vatandaşı Nadejda Savçenkonı azat etmek talaplarını yerine ketirmedi, bu sebepten mahsus cezalar kirsetile bile, misal olaraq, Savçenko işine alâqası olğanlarğa viza berilmeycek ve aktivleri buzlatılacaq.

«Bundan ğayrı, PACEden Rusiye Federatsiyasını Ukrainağa qarşı istilâsını toqtatması içün çağırmağa rica etecekmiz! Bu meseleler cumaaqşamı baqılacaq. Er şey olur, dep ümüt etem!», – dep qoştı Georgiy Logvinskiy.

Aprel 13-te Moskva tayin etken Qırım prokurorı Natalya Poklonskaya yarımadada Qırımtatar Milliy Meclisiniñ faaliyeti aqqında mahkeme qararı olmasa da, Meclis çalışmaycaq, dep bildirdi. Onıñ aytqanına köre, Meclis şeer ve belediye kütleviy haber vastalarından faydalanamaz, er angi kütleviy tedbirni keçiremez, bank ödemelerini qullanamaz ve asılında iç bir işnen oğraşamaz.

2015 senesi fevral ayında Natalya Poklonskaya Rusiyege boysunğan Qırım Yuqarı mahkemesine muracaat etip, Meclis faaliyetini yasaq etmege talap etti. Mart başında işbu dava boyunca mahkeme esnası başlandı. Mahkeme taqiqatı devam etmekte.

Meclis reberleri mahkeme prokuraturanıñ talaplarını yerine ketirecek, dep tahmin eteler.

Ukraina Tışqı işler nazirligi Meclis faaliyetini yasaq etecek olğan Rusiye akimiyetiniñ areketlerine qarşı narazılıq bildirdi. Birleşken Milletler Teşkilâtı Rusiye Federatsiyasını Qırımda Qırımtatar Milliy Meclisiniñ yasaq etilmesine yol bermemege çağırdı. Avropa birligi de Meclis faaliyetini yasaq etmek niyetlerinden qasevetlengenini bildirdi.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG