Link açıqlığı

Saatnıñ esas haberi

Rusiye Qırımdaki jurnalistlerni taqip etmemeli – Jurnalistlerni qoruv komiteti


Jurnalistlerni qoruv halqara komiteti Rusiye akimiyetini işğal etilgen Qırımda jurnalistlerni taqip etmemege ve işlerine devam ete bilmeleri içün imkân bermege çağıra. Bu aqqında New Yorkta yerleken teşkilâtnıñ aprel 19-da aydınlatılğan muracaatında aytıla.

«Bizler Rusiye havfsızlıq hızmetlerini Qırımda jurnalistlerniñ levhaları ve fikirleri içün taqip etmemege çağıramız. Rusiye tenqitni ekstremizm ile aynı seviyege ketirgen qanunlarğa saip, matbuatnı qorqutmaq ve susturmaq içün qanunlarını qullana», – dep ayttı Jurnalistlerni qoruv komitetiniñ Avropa ve Merkeziy Asiyadaki programmalarınıñ koordinatorı Nina Ognânova.

Salı sabası Natalya Poklonskaya Qırım jurnalistine qarşı kütleviy haber vastalarında bastırğan maqaleleri içün «separatizm» maddesi boyunca cinaiy iş açılğanını bildirdi. Soñra Mıkola Semena aqqında laf ketkeni añlaşıldı. Oğlunıñ Qırım.Aqiqatqa bildirgenine köre, babasınıñ evinde tintüv beş saat sürdi. Onıñ Radio Svobodanıñ Qırım.Aqiqat leyhası ile alâqalarını qıdırğanlar. Uquq qoruyıcılar eki bilgisayar, malümat taşıyıcılarını alıp, jurnalistni sorğuğa alıp ketkenler.

Mıkola Semena Qırımdan çıqmamaq şartınen azat etildi. O, qabaatlı olğanını red ete.

Adliyeci Emil Kürbedinov bildirdi ki, tintüvden soñ daa eki jurnalist FSBge alıp ketirildi.

Ukraina haber siyaseti nazirligi bildirdi ki, nazirlik Rusiye işğal etken Qırımda jurnalistlerniñ evlerinde keçirilgen tintüv ve olarnıñ yaqalanmasından sebep halqara teşkilâtlarğa muracaat etecek. OSCE Qırımda ifade serbestligi telüke altında olğanından qasevetlengenini bildirdi.

Ukraina mustaqil media iş birligi yolbaşçısı Yuriy Lukanov aprel 19-da Qırım jurnalistleriniñ evlerinde keçirilgen tintüvlerni serbest matbuatqa basqı dep adladı. Onıñ bildirgenine köre, UMMİB halqara teşkilâtlardan vaziyetke tesir etmege rica etecek.

XS
SM
MD
LG