Aprel 19-da Qırımda Qırım blogeri Zair Akadırovnıñ evinde tintüv keçirildi, dep bildirdi Facebookta adliyeci Emil Kürbedinov. Adliyeci tafsilâtlı bir malümat bermedi.
«Bugün Zair Akadırovnıñ evinde de tintüv keçirildi», – dep yazdı Emil Kürbedinov.
Zair Akadırovnıñ özü cevap bermey.
Natalya Poklonskaya Qırım jurnalistine qarşı kütleviy haber vastalarında bastırğan maqaleleri içün «separatizm» maddesi boyunca cinaiy iş açılğanını bildirdi. Soñra Mıkola Semena aqqında laf ketkeni añlaşıldı. Oğlunıñ Qırım.Aqiqatqa bildirgenine köre, babasınıñ evinde tintüv beş saat sürdi.
Adliyeci Emil Kürbedinov bildirdi ki, tintüvden soñ daa eki jurnalist FSBge alıp ketirildi.
Kütleviy haber vastalarınıñ bildirgenine köre, aprel 19-da tintüvler yedi evde keçirildi – Aqmescit, Yalta ve Aqyarda.
Mıkola Semena Qırımdan çıqmamaq şartınen azat etildi. O, qabaatlı olğanını red ete.
Yanvar 15-te Aqmescitte politsiya hadimleri bloger Zair Akadırovnı yaqaladılar. O, «fevral 26 işi» mahkemesine kelgen edi. Onıñ bildirgenine köre, Rusiye OMON hadimleri onı maşinağa küç qullanıp oturttılar, qarşı çıqacaq olsa, «mağazğa alıp keteceklerini» ayttılar.
Akadırov maşinadan çıqıp oldı, amma bundan soñ politsiya bölüginde bir saat sürgen sorğuğa çekildi.
Akadırov Qırımnıñ Rusiye Yuqarı mahkemesi yanında uquq qoruyıcılarınıñ qanunsız areketlerinden Aqmescitniñ Jeleznodorojnıy rayonı prokuraturasına ve Qırımda insan aqlarından vekâletlige şikâyet etti.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
