Link açıqlığı

Ukraina Baş prokuraturası işğal etilgen Qırımda Qırımtatar Milliy Meclisi faaliyetiniñ qanunsız yasaqlanması boyunca cinaiy taqiqatqa başlağanını bildire.

UBP malümatına köre, esas Ukrainada çalışqan Qırım prokuraturası Rusiyege boysunğan Qırım prokuraturasınıñ Qırımtatar Milliy Meclisini yasaq etmek içün yapqan areketlerine qarşı cinaiy taqiqatta reberlik yapa.

«Bu adise qırımtatar halqı ve Rusiye Federatsiyası tarafından Ukraina topraqlarınıñ vaqtınca işğal etilmesine qarşı çıqqan vatandaşlarğa qarşı repressiyalar Qırım Cumhuriyetiniñ prokuraturası ve akimiyet organları vastasınen devam etkenini ifadeley», – dep aytıla haberde.

Baş prokuratura qayd ete ki, Rusiyege boysunğan Qırım akimiyeti «ekstremist faaliyet ile küreşkenini aytıp, tamır halqlar saasında halqara uquq qaidelerini körmemezlikke ura ve qırımtatarlarnı temsil organlarından marum qaldıracaq ola».

«Qırımnıñ işğalci akimiyeti Meclisni yasaq etip, qırımtatar halqınıñ milliy itibarını tüşüre ve vatandaşlarnıñ aynı derecede olmasını boza», – dep qayd etile.

Aprel 13-te Moskva tayin etken Qırım prokurorı Natalya Poklonskaya yarımadada Qırımtatar Milliy Meclisiniñ faaliyeti aqqında mahkeme qararı olmasa da, Meclis çalışmaycaq, dep bildirdi. Onıñ aytqanına köre, Meclis şeer ve belediye kütleviy haber vastalarından faydalanamaz, er angi kütleviy tedbirni keçiremez, bank ödemelerini qullanamaz ve asılında iç bir işnen oğraşamaz.

2015 senesi fevral ayında Natalya Poklonskaya Rusiyege boysunğan Qırım Yuqarı mahkemesine muracaat etip, Meclis faaliyetini yasaq etmege talap etti. Mart başında işbu dava boyunca mahkeme esnası başlandı. Mahkeme taqiqatı devam etmekte.

Meclis reberleri mahkeme prokuraturanıñ talaplarını yerine ketirecek, dep tahmin eteler.

Ukraina Tışqı işler nazirligi Meclis faaliyetini yasaq etecek olğan Rusiye akimiyetiniñ areketlerine qarşı narazılıq bildirdi. Birleşken Milletler Teşkilâtı Rusiye Federatsiyasını Qırımda Qırımtatar Milliy Meclisiniñ yasaq etilmesine yol bermemege çağırdı. Avropa birligi de Meclis faaliyetini yasaq etmek niyetlerinden qasevetlengenini bildirdi.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG