Link açıqlığı

Rusiyege boysunğan Qırım prokurorı Natalya Poklonskaya Radio Svobodanıñ Qırım.Aqiqat leyhasını bütünley blok etmek içün vesiqalarnı azırlağanını bildirdi.

Bunı o «TASS» Rusiye agentligine ayttı.

«Rusiye Baş prokuraturası ve soñra Roskomnadzorğa «Qırım.Aqiqat» haber hızmetiniñ qapatılması içün vesiqalar azırlaymız», – dedi Poklonskaya.

Qırımnıñ Rusiye prokuraturası saytında da «Qırım.Aqiqatnıñ ayrı maqalelerini blok etmek» teşebbüsi aqqında aytıla.

«Bu resursnıñ talil neticeleri köstere ki, neşir Qırım Cumhuriyetinde Rusiye Federatsiyası faaliyetini aqaretlemege, milletler ve etniklerara qavğa çıqarmağa, em de ekstremist faaliyetke çağırmağa tırışa», – dep aytıla prokuraturanıñ haberinde.

Aprel 19-da saba Qırımda Rusiye uquq qoruyıcıları jurnalistlerniñ evlerinde tintüv keçirip, Qırım.Aqiqat ile alâqalarını qıdırdılar. Natalya Poklonskaya Qırım jurnalistine qarşı kütleviy haber vastalarında bastırğan maqaleleri içün «separatizm» maddesi boyunca cinaiy iş açılğanını bildirdi. Soñra Mıkola Semena aqqında laf ketkeni añlaşıldı. Oğlunıñ Qırım.Aqiqatqa bildirgenine köre, babasınıñ evinde tintüv beş saat sürdi.

Qırımnıñ Rusiye prokuraturası bir sıra digger jurnalistke nisbeten taqiqat areketleri alına, dep bildirdi. Faqat olarnıñ adları ve soyadları aytılmay.

Adliyeci Emil Kürbedinov bildirdi ki, tintüvden soñ daa eki jurnalist FSBge alıp ketirildi.

Ukraina mustaqil media iş birligi yolbaşçısı Yuriy Lukanov aprel 19-da Qırım jurnalistleriniñ evlerinde keçirilgen tintüvlerni serbest matbuatqa basqı dep adladı. Onıñ bildirgenine köre, ÜMMİB halqara teşkilâtlardan vaziyetke tesir etmege rica etecek.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG