Meclis reisi Refat Çubarov Rusiye Federatsiyası Adalet nazirliginiñ Meclisni Rusiyede faaliyeti yasaq etilgen ekstremist teşkilâtlar cedveline kirsetmek qararından şaşmadı. Refat Çubarov Facebook saifesinde böyle qarar tek Ukraina ve onıñ vatandaşları içün degil de, diger devletler içün de telükeli olğanını yazdı.
«Şahsen Putinge suallerim yoq: o, dünya toplulığı yol bergeni qadar işğal etilgen Qırımda özüni deşetli alıp bara. Başqa mesele ise, Ğarp devletleriniñ liderleri özüni bütün dünya taqdirini tizgen dep sayğan Rusiyege nisbeten alıp barğan siyaseti öz milletleri içün aqibetlerni añlay ekenmi?» – dep qayd etti Meclis reisi.
«Bugün qırımtatarlar, ukrainler, Ukraina ucum altında buluna. Yarın Rusiye kimge ucum etecek meselesinden qaçmañız. Bu siziñ devletiñiz ve siziñ halqıñız olacaqtır», – qoştı Refat Çubarov.
Aprel 18-de, bazarertesi künü, Rusiye Adalet nazirligi Qırımtatar Meclisini «ekstremist faaliyetinden sebep» yasaq etilgen teşkilâtlar cedveline kirsetti. Nazirlik saytında qayd etilgenine köre, bu qarar «Qırım cumhuriyeti prokurorınıñ cemaat birleşmesi faaliyetiniñ toqtatılması aqqında qararı boyunca» qabul etildi.
Ukraina Tış işler nazirliginde bu qararnı «insan aqlarını büyük bozuvı» ve Qırımnıñ tamır halqına qarşı Stalin repressiyalarınıñ devamı dep adlandırdı.
Aprel 3-te Kreml tarafından tayin etilgen Qırım prokurorı Natalya Poklonskaya Qırımtatar halqınıñ Meclisi faaliyetiniñ mahkeme qararına qadar toqtatılması aqqında qarar alğanını bildirdi.
Bundan evel Birleşken milletler teşkilâtı Rusiye Federatsiyasını Qırımda qırımtatar halqı Meclisiniñ qapatmasına yol bermemege çağırdı. Avropa Birligi Meclisni qapatmaq niyetlerden raatsız olğanını bildirdi.
Aprel 15-te, cuma künü, Qırımda Meclisni yasaq etmesi davası boyunca nevbetteki mahkeme toplaşuvı keçirildi, nevbetteki toplaşuvnı aprel 25-te keçirmek qararı alındı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
