Kyivde aprel 19-da «Golodomor qurbanlarınıñ memorialı» Milliy müzeyiniñ zalında Golodomor ve qırımtatar halqı sürgünliginiñ qurbanları añına hatıra aqşamı keçirilecek.
Bunı Qırımtatar resurs merkezi bildire.
Qırımtatar liderleri, bediiy taqımlar tedbirge qoşulacaq. «Golodomor. Ukradennoye serdtse» («Golodomor. Hırsızlanğan yürek») edebiy-muzıkalı performansı olacaq. Hatıra aqşamınıñ iştirakçilerine «Haytarma» bediiy filmi kösterilecek.
Rusiye Qırımnı işğal etken soñ yüzlernen adamlar esas Ukrainağa köçip keldiler. Qırımtatar halqınıñ liderlerine yarımadağa kirişleri yasaq etildi.
Qırımtatar halqı sürgünliginiñ qurbanları mayıs 18-de añıla. 1944 senesi Stalinniñ emri ile sürgünlik başlandı. Üç kün içinde 250 biñ insan yarımadadan çıqarıldı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
