Link açıqlığı

Rusiye tarafından işğal etilgen Qırım ile sıñırda yerleşken Herson vilâyetinde vaziyetni kerginleştirmek içün ıntıluvlar devam etecek. Böyle fikirni Yaqın Şarq ukrain tedqiqat merkeziniñ müdir muavini Sergey Danilov bildirdi.

«Soñki ay devamında yüz bergen vaqialarğa binaen, biz cenübiy regionlarda, Herson vilâyetinde, birinciden, Geniçesk rayonında istilâcınıñ terroristik ucumlarına azır olmalımız. Birinciden, Geniçesk rayonında vaziyetni kerginleştirmek içün ıntıluvlar devam etecek», – dep qayd etti ekspert Qırım.Aqiqat içün bergen izaatında.

Bunı köz ögüne alıp, o, ukrain ükümeti organları tarafından bu vaziyetke izaat berilmesiniñ lâzim ve müim olğanına diqqat etti.

«Anlaşılmamazlıq ükümet tarafından izaat yoq olğanından peyda ola. Rusiyeniñ mahsus hızmetleri qırımtatar faallerini region sakinleri içün esas telüke olğanlarını köstermek, ve mesüliyetni özlerinden başqalarına keçirmek içün çalışa», – dep ayttı o.

Aprel 15-te Geniçesk rayonınıñ Novoalekseyevka qasabasında, işğal etilgen Qırım ile memuriy sıñırğa yaqın bir yerde, Odessa nomeraları olğan VAZ-2101 maşinasında patlav yüz berdi. Bunıñ neticesinde bir kişi elâk oldı, dört insan yaralandı. Patlav terror eylemi olaraq tanıldı ve, vilâyet ükümetiniñ bildirgenine köre, rayon territoriyasında toplu yaşağan qırımtatarlarğa qarşı yapılğan arekettir.

XS
SM
MD
LG