Aprel 18-de saba Qırımdaki Partenit köyünde (Aluşta) yerli sakinler telâşqa tüşti: köyde yüzge yaqın politsiya ve OMON hadimi peyda oldı. Bunı «Tvoya gazeta» yerli neşiri bildire.
Neşirniñ malümatına köre, uquq qoruyıcılar eki avtobusnen Partenitke «iş vazifesi» ile keldi.
«Olar köyde qanunnı bozuv ve cinayetlerniñ ögüni almaq içün plan işlerini yapacaq, em de köyge qanunsız musafirlerniñ kelmemesi içün pasport rejimini nezaret astında tutacaqlar. Partenitten ğayrı, bunıñ kibi merasimler yarımadanıñ diger meskün yerlerinde de keçirilecek», – dep yaza neşir.
Partenitte bunıñ kibi merasimlerniñ keçirilmesi boyunca resmiy malümat yoq.
Adliyeci Emil Kurbedinovnıñ malümatına köre, aprel 18-de saba Qızıltaş köyünde (Yalta) yaşağan qırımtatarlarda tintüvler keçirildi, bundan soñ eki insan yaqalandı.
Rusiyege boysunğan Qırım prokurorı Natalya Poklonskaya Yaltada «Hizb ut-Tahrir» ile bağda olğanında şeklengen eki insan yaqalanğanını bildirgeni aqqında malümat peyda oldı.
Keçken afta soñu künleri Qırımnıñ Aluşta regionınıñ Arpat köyünde politsiya hadimleri reyd keçirgenleri aqqında bildirilgen edi.
Fevral 11-12 künleri Rusiye uquq qoruyıcıları Qırımda islâm dinini kütkenlerniñ evlerinde bir sıra tintüv keçirip, insanlarnı yaqaladılar. Umumen 14 insan yaqalandı, olardan dörtü apiske alındı: Yaltada İnsan aqları bağ gruppasınıñ azası Emir-Üsein Kuku, Yalta rayonınıñ sakini Enver Bekirov, Aluşta rayonınıñ sakini Müslim Aliyev ve Yaltalı Vadim Siruk. FSB taqiqatçıları olarnı Rusiyede yasaq etilgen «Hizb ut-Tahrir» teşkilâtında iştirak etmeleri ile qabaatladılar. Dörtü de Aqmescitte SİZOda yatalar. Teşkilâtqa alâqaları olmağanını aytalar.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
