Qırımtatar Milliy Meclisi reisi Refat Çubarov aprel 18-de Yaltada yüz bergen yañı tintüv ve qırımtatarlarnıñ yaqalanuvına izaat berip, böyle etip Rusiye uquq qoruyıcıları evelden yaqalanğan qırımtatarlarnıñ sıralarını çoqlaştırğanlarını qayd etti.
«Belli ki, yaqalanğan Refat Alimov ve Arsen Cepparov daa evel bunıñ kibi uydurılğan qabaat boyunca yaqalanğan 8 qırımtatarnıñ sırasına kirecektirler», – dep yazdı Refat Çubarov öz Facebook saifesinde ve «Hizb ut-Tahrir» ile bağda olğanında şeklenip yaqalanğanlarnı añdı.
«Aynı vaqıtta Federal Havfsızlıq Hızmetiniñ apishanelerinde Qırımtatar Meclisiniñ reis muavini Ahtem Çiygoz (2015 senesi yanvar 29-den berli), qırımtatar milliy areketiniñ iştirakçileri Ali Asanov (2015 senesi aprel 15-ten berli) ve Mustafa Degermenci (2015 senesi mayıs 7-den berli) yatmağa devam eteler», – dep qoştı Meclis reisi.
Aprel 18-de, bazarertesi künü, Qızıltaş köyünde (Yalta) Rusiye uquq qoruyıcıları tintüv keçirip, eki qırımtatarı - Refat Alimov ve Arsen Cepparovnı yaqaladılar. Soy-soplarınıñ bildirgenlerine köre, ekisi de şimdi Aqmescitteki Rusiye Federal Havfsızlıq Hızmetiniñ idaresinde sorğuğa çekile.
Rusiyege boysunğan Qırım prokurorı Natalya Poklonskaya aprel 18-de Yaltada «Hizb ut-Tahrir» ile bağda olğanında şeklengen eki insan yaqalanğanını bildirdi.
Aluşta kütleviy haber vastalarınıñ malümatına köre, aprel 18-de saba Partenitke de pasportlarnı teşkermek maqsadı ile politsiya ve OMON hadimlerinen eki avtobus kirdi.
Keçken afta soñu künleri Qırımnıñ Aluşta regionınıñ Arpat köyünde politsiya hadimleri reyd keçirgenleri aqqında bildirilgen edi.
Fevral 11-12 künleri Rusiye uquq qoruyıcıları Qırımda islâm dinini kütkenlerniñ evlerinde bir sıra tintüv keçirip, insanlarnı yaqaladılar. Umumen 14 insan yaqalandı, olardan dörtü apiske alındı: Yaltada İnsan aqları bağ gruppasınıñ azası Emir-Üsein Kuku, Yalta rayonınıñ sakini Enver Bekirov, Aluşta rayonınıñ sakini Müslim Aliyev ve Yaltalı Vadim Siruk. FSB taqiqatçıları olarnı Rusiyede yasaq etilgen «Hizb ut-Tahrir» teşkilâtında iştirak etmeleri ile qabaatladılar. Dörtü de Aqmescitte SİZOda yatalar. Teşkilâtqa alâqaları olmağanını aytalar.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
