Rusiye Taqiqat komitetiniñ yolbaşçısı Aleksandr Bastrıkin 2014 senesi Rusiye işğal etken Qırımda keçirilgen «referendumnıñ» tanılmamasını «ekstremistik faaliyetniñ hususiyetleri» olaray adlay.
Bu aqqında onıñ «Kommersant-Vlast» neşirinde çıqqan maqalesinde aytıla.
«Qırım federal bölgesinde ekstremistik faaliyetniñ belli bir hususiyetleri qayd etile, anda Rusiyege qarşı çıqmağa tırışalar, tarihiy malümatnı ve zemaneviy vaqialarnı yañlış tanıtıp, Qırımnıñ Rusiye Federatsiyasına qoşulması aqqında referendum neticelerinden şübelenmege zorlaycaq olalar», – dep aytıla maqalede.
«Ekstremist faaliyetine qarşı areketler aqqında» federal qanunğa bütünhalq referendumı neticeleriniñ inkâr etilmesini ektremizmniñ bir şekli olaraq kirsetmek kerektir. Devletimizniñ tarihını yañlış tanıtmaq ıntıluvlarına yol bermemek kerek», – dep tüşüne Bastrıkin.
2014 senesi mart 16-da Rusiye Federatsiyasınıñ arbiy ve siyasiy yardımınen Qırımda anayasağa uymağan ve dünyada tanılmağan referendum olıp keçti, onıñ neticesinde Rusiye yarımadanı öz terkibine aldı.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
