Link açıqlığı

Saatnıñ esas haberi

Poklonskaya Yaltada «Hizb ut-Tahrir» teşkilâtınıñ eki tarafdarı yaqalanğanını bildire


Natalya Poklonskaya
Natalya Poklonskaya

Rusiyege boysunğan işğal etilgen Qırım prokurorı Natalya Poklonskaya Yaltada «Hizb ut-Tahrir» tarafdarlarınıñ yaqalanğanını bildire. Bunı o aprel 18-de «TASS» Rusiye agentligine ayttı.

«Rusiye qanunlarında terroristik tanılğan teşkilâtnıñ faaliyetinde iştirak etkeninden sebep Yaltanıñ eki sakinine qarşı 205.5 maddesiniñ 2-nci qısmı boyunca cinaiy iş açıldı. Taqiqat çerçivesinde bu şahıslar yaqalandı. Delillerni toplamaq içün taqiqat-operativ tedbirler keçirile», – dedi Poklonskaya.

Aprel 18-de adliyeci Emil Kürbedinov Yaltanıñ Qızıltaş köyünde keçirilgen tintüv ve yaqalanğan eki kişi aqqında bildirdi.

Fevral 11-12 künleri Rusiye uquq qoruyıcıları Qırımda islâm dinini kütkenlerniñ evlerinde bir sıra tintüv keçirip, insanlarnı yaqaladılar. Umumen 14 insan yaqalandı, olardan dörtü apiske alındı: Yaltada İnsan aqları bağ gruppasınıñ azası Emir-Üsein Kuku, Yalta rayonınıñ sakini Enver Bekirov, Aluşta rayonınıñ sakini Müslim Aliyev ve Yaltalı Vadim Siruk. FSB taqiqatçıları olarnı Rusiyede yasaq etilgen «Hizb ut-Tahrir» teşkilâtında iştirak etmeleri ile qabaatladılar. Dörtü de Aqmescitte SİZOda yatalar. Teşkilâtqa alâqaları olmağanını aytalar.

2015 senesi qışta Aqyarda dört musulman apiske alındı: Ruslan Zeytullayev, Rustem Vaitov, Nuri Primov ve Ferat Sayfullayev. Olarnı da «Hizb ut-Tahrir» ile alâqalarında qabaatlaylar. Apiske alınğanlarnıñ soy-sopları tuvğanlarını qorumaq içün birleştiler.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG