Qırım adliyecisi Emil Kürbedinov aprel 18-de Rusiye uquq qoruyıcıları işğal etilgen Qırımda keçirgen yañı tintüv aqqında bildire.
Adliyeciniñ malümatına köre, tintüv Yaltanıñ Qızıltaş (Krasnokamenka) köyünde keçirile.
«Qızıltaşta tintüvler. Enver Bekirova anda yaqalanğan edi. Elde etilgen malümatqa köre, eki kişi yaqalandı», – dep bildirdi Kürbedinov Facebookta.
Başqa malümat yoq. Qırımnıñ Rusiye uquq qoruyıcı hızmetleriniñ izaatları yoq.
Raatlıq künleri Aluşta regionınıñ Arpat köyünde politsiya evlerni teşkerdi.
Fevral 11-12 künleri Rusiye uquq qoruyıcıları Qırımda islâm dinini kütkenlerniñ evlerinde bir sıra tintüv keçirip, insanlarnı yaqaladılar. Umumen 14 insan yaqalandı, olardan dörtü apiske alındı: Yaltada İnsan aqları bağ gruppasınıñ azası Emir-Üsein Kuku, Yalta rayonınıñ sakini Enver Bekirov, Aluşta rayonınıñ sakini Müslim Aliyev ve Yaltalı Vadim Siruk. FSB taqiqatçıları olarnı Rusiyede yasaq etilgen «Hizb ut-Tahrir» teşkilâtında iştirak etmeleri ile qabaatladılar. Dörtü de Aqmescitte SİZOda yatalar.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
