Link açıqlığı

Rusiye adliyecisi Mark Feygin aprel 14-te Moskvanıñ Meşçansk mahkemesinde qırımtatarlarnıñ milliy lideri Mustafa Cemilevniñ Federal havfsızlıq hızmetine Rusiye işğal etken Qırımğa kiriş yasağınen bağlı açtırğan davası boyunca toplaşuv aqqında bildirdi.

Adliyeciniñ bildirgenine köre, devlet sırı olğanına esaslanıp, iş Moskva şeeriniñ mahkemesine yollandı.

«Cemilevniñ FSBden şikâyeti boyunca mahkeme toplaşuvı olıp keçti. Devlet sırı olğanını aytıp, Moskva şeeriniñ mahkemesine berdiler. Eñ azında, kiriş yasağı vesiqasını körermiz», – dep yazdı Feygin Twitterde.

Fevral ayında Ukraina prezidentiniñ qırımtatar halqı işlerinden vekâletlisiniñ matbuat hızmeti adliyeci Mark Feygin tarafından qırımtatarlarnıñ milliy lideri Mustafa Cemilevge Qırımğa kirişi qanunsız şekilde yasaq etilgeninden Rusiye Federal havfsızlıq hızmetine qarşı dava açtırğanını haber etken edi. Aynı yasaq Qırımtatar Milliy Meclisiniñ reisi Refat Çubarovğa da berildi. Bu işlerni İnsan aqları Avropa mahkemesi de baqa.

Bundan evel Cemilev Qırımğa kirişi yasaq etilgeninden sebep Rusiye Federal migratsion hızmetine qarşı dava açtırğan edi.

2014 senesi aprel 22-de Mustafa Cemilevge 5 yıl devamında Qırımğa kelmege yasaq ettiler.

Rusiyeniñ Qırım işğalinden soñ Mustafa Cemilev Ukraina prezidentiniñ qırımtatar halqı işlerinden vekâletlisi vazifesine tayin etildi.

Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG