Aprel 19-da «Qırım evi» devlet müessisesiniñ «Autonomuos» medeniy meydançığında «Tamır halqlar» filmi taqdim etilecek.
Bunı leyha reberi Veldar Şukurciyev Qırım.Aqiqatqa bildirdi.
«İcadiy taqım Ukrainanıñ tamır halqları aqqında tarif etecek. Film müellifleri ukrainler aqqında ve qırımtatarlarnıñ Ukrainanıñ tamır halqı olaraq aq-uquqları aqqında maarif analitik-informatsion faaliyetinde ilk adım atmağa tırıştılar. Bu filmde farqlı insanlarnıñ fikirlerini aydınlatmağa tırıştıq: ekspert, siyasetçi, tamır halqnıñ temsilcileri ve adiy ukrainlerniñ yarımadanıñ keleceginen bağlı fikirlerini ögrendik. Bu film ukrain cemiyetinde faydalı bir subet temeli olacağına ümüt etemiz», – dep qayd etti Veldar Şukurciyev.
Natalya Belitser ve Yuliya Tişçenkonıñ ekspert yardımı ile «Golos Krıma» («Qırım sesi») malümat agentliginiñ icadiy taqımı çalışqan film Ukrainada Büyük Britaniyanıñ maddiy destegi ile «Ukrain barıştırıcı mektebi» leyhası çerçivesinde çıqarıldı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
