Link açıqlığı

Saatnıñ esas haberi

Volodımır Groysman onıñ ükümetinde Qırım nazirligi olacağını vade ete


Ukrainanıñ yañı tayinlengen baş naziri Volodımır Groysman bildirdi ki, onıñ ükümeti Rusiye işğal etken Qırımnıñ Ukraina nezareti altına keri qaytarılması meselelerine diqqat ayıracaq.

«Ükümetniñ yañı erkânı ayrı diqqat ayıracaq daa bir mesele – Qırım ve vaqtınca işğal etilgen Donbass topraqlarınıñ qaytarılması, azat etilgen topraqlarda yaşayışnıñ ğayrıdan tiklenmesi ve köçip kelgenlerniñ avdet olmasıdır», – dedi Groysman.

Onıñ aytqanına köre, Nazirler şurasında ayrı nazirlik olacaq. Baş nazirniñ bildirgenine köre, bu yönelişte baş nazirniñ muavini çalışacaq.

Ukraina Yuqarı Radası Volodımır Groysman reberligi altında Ukraina ükümetiniñ yañı erkânına rey berdi. Buña 239 deputat qoltuttı.

2014 senesiniñ başında Rusiye Qırımnı işğal etken soñ Ukraina prezidentiniñ Qırımdaki daimiy temsilciligi Hersonda, Baş prokuratura yanında Qırım Muhtar Cumhuriyetiniñ prokuraturası Kyivde, Ukraina ükümeti yanında Qırım ve Aqyar meselelerinden devlet hızmeti, Ukraina İçki işler nazirliginiñ Qırım Muhtar Cumhuriyetinde Baş idaresi Odessada çalışalar. Ukraina prezidentiniñ qırımtatar halqı işlerinden vekâletlisi Mustafa Cemilev ola.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG