Link açıqlığı

Saatnıñ esas haberi

Qırım mahkemesi «fevral 26 işi» iştirakçileriniñ apis cezalarınıñ arttırılmasınen bağlı ekinci qararnı lâğu etti


Rusiye kontrol etken Qırım Yüksek mahkemesi aprel 14-te mahkemeci Galina Redkonıñ mart 4-te «fevral 26 işiniñ» iştirakçileri Ahtem Çiygoz, Ali Asanov ve Mustafa Degermenciniñ apis cezalarınıñ qanunsız uzatılması aqqında çıqarğan ekinci qararını lâğu etti. Bunı esnasnıñ iştirakçilerinden biri Qırım.Aqiqatqa bildirdi.

«Mahkeme apellâtsion şikâyetiniñ delillerinen razı olıp, mahkemeciniñ qararını lâğu etti», – dedi o.

Bundan evel mahkeme Redkonıñ mart 2-de qabul etken qararından berilgen aynı şikâyetni baqıp, onı da qanunsız tanıdı.

Qırım Rusiye tarafından işğal etilgen soñ yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksenov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahkeme etmege başladılar.

Vaqialar 2014 senesi fevral 26-da olıp keçken edi. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi.

Fevral 15-te Qırımnıñ Yuqarı mahkemesi bu işni tekrar taqiq etilmesine yollamağa qarar aldı.

Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG