Link açıqlığı

Qırımtatar Milliy Meclisiniñ reisi Refat Çubarov Kreml tayin etken Qırım prokurorı Natalya Poklonskayanıñ Meclis faaliyetini toqtatmaq qararını «olmaycaq bir şey» dep adladı. Refat Çubarovnıñ Facebookta yazğanına köre, bu qarar Kremlniñ emri ile qabul etildi.

«Şübemiz yoq, bu «qarar» kesen-kes Kremlniñ emri ile qabul etildi, Putin ve yanında olğan insanlar halqara dünya ile çatışmacı munasebet yollarını quvetleştireler», – dep qayd etti Meclis reisi.

Onıñ aytqanına köre, halqara toplulıqnıñ Qırımnıñ tamır halqı – qırımtatarlarnıñ temsil organına basqı yapmamaq çağıruvlarına «masqara» ve «sert» bir cevap berildi.

«Yarımadanı işğal etken Rusiye Qırımnıñ tamır halqını doğrudan-doğru yoq etmesin dep, Ukraina prezidenti Birleşken Milletler teşkilâtınıñ Baş kâtibi, Avropa parlamenti ve Avropa Şurasına muracaat etip, BMT Havsfzlıq şurası, Avropa Birligi ve Avropa Şurasınıñ icra organlarını acele sürette toplamağa talap etmek kerek», – dep qayd etti Refat Çubarov.

Onıñ qayd etkenine köre, Natalya Poklonskayanıñ mezkür areketi oña qarşı qabaat, şu cümleden devlet hainliginiñ temeli olacaqtır.

«İşğal etilgen Qırımda «prokuror» vazifelerini eda etken Poklonskayanıñ «Qırımtatar Milliy Meclisiniñ faaliyetini toqtatmaq» qararı, şübesiz, olmaycaq bir şey, faqat Qırımnı işğal etken Rusiye Federatsiyasınıñ ceza organları tarafından teminlenecek», – dedi Refat Çubarov.

Resmiy Kyiv Qırımda Meclis faaliyetiniñ toqtatılması qararını şimdilik izaatlamadı.

Meclisniñ adliyecileri bu qarardan şikâyet eteceklerini bildirdiler.

Çarşenbe künü, aprel 13-te, Moskva tayin etken Qırım prokurorı Natalya Poklonskaya yarımadada Qırımtatar Milliy Meclisiniñ faaliyeti aqqında mahkeme qararı olmasa da, Meclis çalışmaycaq, dep bildirdi. Onıñ aytqanına köre, Meclis şeer ve belediye kütleviy haber vastalarından faydalanamaz, er angi kütleviy tedbirni keçiremez, bank ödemelerini qullanamaz ve asılında iç bir işnen oğraşamaz.

2015 senesi fevral ayında Natalya Poklonskaya Rusiyege boysunğan Qırım Yuqarı mahkemesine muracaat etip, Meclis faaliyetini yasaq etmege talap etti. Mart başında işbu dava boyunca mahkeme esnası başlandı. Nevbetteki mahkemeniñ keçirilmesi aprel 15 kününe planlaştırıla.

Meclis reberleri mahkeme prokuraturanıñ talaplarını yerine ketirecek, dep tahmin eteler.

Ukraina Tışqı işler nazirligi Meclis faaliyetini yasaq etecek olğan Rusiye akimiyetiniñ areketlerine qarşı narazılıq bildirdi. Birleşken Milletler Teşkilâtı Rusiye Federatsiyasını Qırımda Qırımtatar Milliy Meclisiniñ yasaq etilmesine yol bermemege çağırdı. Avropa birligi de Meclis faaliyetini yasaq etmek niyetlerinden qasevetlengenini bildirdi.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG