Türkiye Cumhuriyetiniñ prezidenti Recep Tayip Erdoğan İstanbulda keçirilgen İslâm konferentsiyasınıñ 13-ünci sessiyasında çıqışta bulunıp, İslâm işbirligi teşkilâtını Ukrainağa ve qırımtatar halqına birdemlik köstermege çağırdı.
Bunı Ukraina prezidentiniñ qırımtatar halqı işlerinden vekâletlisi Mustafa Cemilevniñ matbuat hızmeti cumaaqşamı künü, aprel 14-te, Facebookta bildire.
«Reislik yapqan Türkiye prezidentiniñ çıqışı yekünlendi. Prezident Recep Tayip Erdoğan İslâm işbirligi teşkilâtınıñ azalarını Ukraina devletine ve işğal etilgen Qırımda yaşağan musulman qardaşları qırımtatarlarğa birdemlik köstermege çağırdı», – dep aytıla haberde.
Qırımtatarlarnıñ liderleri Mustafa Cemilev ve Refat Çubarov aprel 14-15 künleri İstanbulda bulunalar, bu künleri anda İslâm konferentsiyasınıñ 13-ünci sessiyası keçirilmekte. Qurultay delegatı Rustem Ümerov da qırımtatar liderlerinen beraber İslâm İşbirligi Teşkilâtınıñ toplaşuvına yol aldı.
İslâm işbirligi teşkilâtı – islam memleketleriniñ halqara teşkilâtıdır, eñ büyük ve eñ itibarlı resmiy musulman halqara ükümet teşkilâtı ola.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
