Link açıqlığı

Mustafa Cemilev Litvaniyadaki Mykolas Romeris universitetiniñ fahriy doktorı oldı


Mustafa Cemilev Mykolas Romeris universitetinde

Qırımtatar halqınıñ milliy lideri, Ukraina prezidentiniñ qırımtatar halqı işlerinden vekâletlisi Mustafa Cemilev Litvaniyadaki Mykolas Romeris universitetiniñ Fahriy doktorı unvanına nail oldı.

Bunı Cemilevniñ matbuat hızmeti salı künü, aprel 12-de, bildirdi.

Mykolas Romeris Universiteti – halqara devlet universiteti, Litvaniyanıñ eñ büyük aliy oquv yurtlarından biri, içtimaiy ve gumanitar ilimlernen oğraşa.

Vilniusta aprel 11-13 künleri Dünya qırımtatar kongressi İdare şurasınıñ toplaşuvı keçirilmekte. Tedbir «İşğal etilgen Qırımda insan aqlarınıñ bozuluvı» halqara konferentsiyasından başlandı. Konferentsiya devamında Rusiyeniñ Qırım işğali ve yarımadada qırımtatarlarnıñ vaziyetine dair bir qaç muracaat ve beyanname seslendirildi.

Rusiye akimiyeti işğal etilgen Qırımda insan aqları bozulğanını red ete.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG