İşğal etilgen Qırımda aprel 21-de keçirilmesi planlaştırılğan yañı milliy cemiyet – «qırımtatar milliy-medeniy muhtariyetiniñ» taqdim merasimini ilân eteler. Bunı Kremlge boysunğan yarımada ükümetiniñ matbuat hızmeti bildire.
«Reabilitatsiyası yapılğan halqlarnıñ canlanuv kününe bağışlanğan bayram tedbirleri belgilendi. Tedbir planlarına köre, reabilitatsiyası yapılğan vatandaşlarğa daire anahtarları berilecek, qırımtatar milliy-medeniy muhtariyeti taqdim etilecek ve «Vetan sedası» radiosı yayınğa başlaycaq», – dep aytıla haberde.
Eglence programması Aqmescitteki Trenev bağçasında keçirilecek. Kontsert, Qırımnıñ dekorativ-ameliy sanatı eserleriniñ sergisi keçirilecek, Qırım halqlarınıñ yemekleri taqdim etilecek.
Qırım milletlerara munasebetler Devlet komitetiniñ saytında milliy-medeniy muhtariyet olaraq milliy-medeniy cemiyetler tanıtıla. Sayt malümatına köre, yarımadada bunıñ kibi aman-aman 10 cemiyet mevcut.
Qırımnıñ reabilitatsiyası yapılacaq halqlarınıñ canlanuv künü Rusiye prezidenti Vladimir Putinniñ «Ermeni, bulğan, yunan, italyan, qırımtatar ve alman halqlarınıñ reabilitatsiyası tedbirleri ve olarnıñ canlanması ve inkişafına kösterilecek devlet yardımı aqqında» buyruğı imzalamasınıñ ekinci yıllığına bağışlana. Buyruq aprel 21-de imzalanğan edi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
