Qırımtatarlarnıñ liderleri Mustafa Cemilev ve Refat Çubarov aprel 14-15 künleri İstanbulda bulunalar, bu künleri anda İslâm konferentsiyasınıñ 13-ünci sessiyası keçirilmekte.
Bunı Cemilevniñ matbuat hızmeti bildire.
Qurultay delegatı Rustem Ümerov da qırımtatar liderlerinen beraber İslâm İşbirligi Teşkilâtınıñ toplaşuvına yol aldı.
Mustafa Cemilevniñ Qırım.Aqiqatqa bergen malümatına köre, işbu konfereniyada olar Rusiyeniñ Qırım işğali ve islâm devletleriniñ Ukrainağa onıñ topraq bütünligi meselelerinde qoltutuvı aqqında söz yürsetecekler.
İslâm işbirligi teşkilâtı – islam memleketleriniñ halqara teşkilâtıdır, eñ büyük ve eñ itibarlı resmiy musulman halqara ükümet teşkilâtı ola.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
