Aprel 11-13 künleri Vilniusta keçirilgen Dünya qırımtatar kongressi İdare şurası toplaşuvınıñ iş neticeleri eñ yaqın vaqıtta derc etilecek.
Bunı Qırımtatar Milliy Meclisiniñ reis muavini, BDQK şurasınıñ işinde iştirak etken İlmi Ümerov Qırım.Aqiqatqa bildirdi.
«Mence, 2-3 kün içinde derc eterler. Metinni tercime etmek kerek, çünki türk tilinde qabul etildi», – dep qayd etti Ümerov.
Onıñ bildirgenine köre, vesiqa qırımtatarlarnıñ Ukrainadaki aq-uquqları qanun ceetinden teminlenmesi kerek olğanını köstere.
«Ukrainada qırımtatar halqı ve onıñ temsil organları Qurultay ve Meclisniñ aq-uquqlarını kefil etken qanunlarnı ve Anayasa deñişmelerini qabul etmek kerek», – dep qayd etti Ümerov.
Qırım.Aqiqatnıñ malümatına köre, Kongress beyannamesinde diger devletlerniñ parlamentlerine qırımtatarlarğa qoltutmaq ve repressiyalardan qorçalamaq çağıruvları mevcut.
Dünya qırımtatar kongressi İdare şurasınıñ toplaşuvı «İşğal etilgen Qırımda insan aqlarınıñ bozuluvı» halqara konferentsiyasından başlandı. Konferentsiya devamında Rusiyeniñ Qırım işğali ve yarımadada qırımtatarlarnıñ vaziyetine dair bir qaç muracaat ve beyanname seslendirildi.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
