Link açıqlığı

Litvaniya Tış işler naziri Linas Linkâviçüsniñ fikirince, dünya toplulığı Rusiyeniñ Qırım işğaline kerek olğanı qadar emiyet bermey. Bunı o Dünya qırımtatar kongressi İdare şurasınıñ Vilniustaki toplaşuvı munasebetinen keçirilgen Litvaniya parlamentiniñ toplaşuvında ayttı, dep haber ete Cemilevniñ matbuat hızmeti bazarertesi künü, aprel 11-de, Facebookta.

«Halqara alanda bu meselege qoltutqanımız halqara qıymetlerge qoltutqanımıznı ifadeley. Biz bu meselelerni yardım etmek ve özüni begendirmek içün kötermedik. Kerçekten qasevetlendirgen bir mevzu. Taqdiriñiz – dünyanıñ bu problemlerge munasebetini aks ettire. Şimdilik neticeleri pek lâyıq olmasa da, işimizge devam etecekmiz», – dep ayttı Litvaniya Tış işler naziri.

«Ukrainada olğan soñki vaqialarnıñ aqibetini köremiz. Bir qaç yıl evelsi bombalar vastasınen ücüm etilgen olsa, şimdi adamlarnıñ yüreklerine oq kirsetken teşviqat qullanıla. Şimdige qadar öyle devam ete», – dep ayttı Linas Linkâviçüs. Onıñ qayd etkenine köre, «telükeler siziñ içün de, bizim içün de bar».

Vilniusta aprel 11-13 künleri Dünya qırımtatar kongressi İdare şurasınıñ toplaşuvı keçirilmekte. Tedbir «İşğal etilgen Qırımda insan aqlarınıñ bozuluvı» halqara konferentsiyasından başlandı.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG