Qırımtatarlarnıñ milliy lideri Mustafa Cemilev Vilniusta Dünya qırımtatar kongressi İdare şurasınıñ toplaşuvında bulunıp, qırımlılar Qırımnı azat etüv meselelerinde «dünya toplulığınıñ fikirleri sağlam olacağına» ümüt eteler, dep ayttı.
Bunı Cemilevniñ matbuat hızmeti Facebookta bazarertesi künü, aprel 11-de, bildirdi.
«Dünya toplulığınıñ fikirleri sağlam olacağına ümüt etemiz. Yalıñız bizler telükede degilmiz – bütün dünya zarar köre bile. Dünya toplulığını körmegen rejimnen qarşılaştıq. Küreşimizge faal sürette devam etip, dünyada demokratik quvetlerniñ yardımına işanamız», – dep ayttı qırımtatarlarnıñ lideri.
Mustafa Cemilevniñ aytqanına köre, Rusiye işğal etken Qırımda onıñ halqı «totalitar ve faşist rejimniñ altında» qaldı.
«Qırımtatar halqı zor bir vaziyette. On yıllar devamında demokratiya ve Vatan oğrunda küreşken halq kene totalitar ve faşist rejiminen qarşılaştı, bir çoq insan Vatanını terk etmege mecbur», – dedi Mustafa Cemilev.
Vilniusta aprel 11-13 künleri Dünya qırımtatar kongressi İdare şurasınıñ toplaşuvı keçirilmekte. Tedbir «İşğal etilgen Qırımda insan aqlarınıñ bozuluvı» halqara konferentsiyasından başlandı.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
