Link açıqlığı

Saatnıñ esas haberi

Qırımğa İraq Cumhuriyeti parlamentiniñ Al-Ahrara blokunıñ reisi keldi


Rusiye nezareti altında bulunğan Qırım parlamentinde bildirilgeni kibi, yarımadağa İraq parlamentiniñ Al-Ahrara blokunıñ yetekçisi, İraq ükümetiniñ sabıq naziri Dhiaa Naym Abdulla Al-Asadi keldi, o, işğal etilgen Qırımnıñ Anayasa Kününe bağışlanğan tedbirlerde iştirak etecek.

Olğan malümatqa köre, aprel 10 künü onı Qırım parlamenti reisiniñ muavini Remzi İlyasov ve Rusiye prezidenti yanında Qırımnıñ daimiy temsilcissi Georgiy Muradov qarşıladılar.

Körüşüv devamında Dhiaa Naym Abdulla Al-Asadi İraqtaki arbiy areketler ve Rusiye ile dostluq munasebetleri aqqında tarif etti. Bunıñ ile beraber «Qırım ve İraq arasında siyasiy, iqtisadiy ve medeniy alâqalarnıñ inkişafına» ümütlerini bildirdi.

Qırım parlamentiniñ malümatına köre, İraq deputatınıñ ziyareti çerçivesinde Qırım yolbaşçılığı ile körüşecek, Bağçasaray, Aqyar ve Yalta müzeyleri ve diqqatqa lâyıq yerlerine baracaq ola.

Rusiye Qırımnı işğal etkeninden soñ yarımadada aprel 11 künü Qırımnıñ Rusiye Anayasasınıñ Kününi qayd etmege başladılar.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG