Link açıqlığı

Vinnitsada mayıs 26-29 künleri «Intermezzo» Halqara ikâyeler festivali keçirilecektir. Onıñ mahsus programması çerçivesinde Qırım mevzuları aydınlatılacaq, dep bildireler teşkilâtçıları.

«Festivalniñ mahsus programması Qırım ve qırımtatarlar, yarımadanıñ medeniy kimligi meseleleri, Qırım halqlarınıñ tarihiy taqdiri, ğayıp etken ve elde etken ev meselesine bağışlanacaq», – dep aytıla haberde.

Teşkilâtçılarnıñ aytqanına köre, «120 yıl evelsi yarımada ayatında kederli deñişmelerni qayd etken» Mihail Kotsübinskiyniñ Qırım novellaları mevzunı saylamağa ilham bergenler.

Berilgen malümatqa köre, Ukraina, Poloniya, Çeh Cumhuriyeti, İrlandiya, Aqrusiye, Ermenistan ve diger memleketlerniñ medeniyet erbapları sanat vastalarını qullanıp, cemiyet içün müim olğan meselelerni köterecekler.

Qırım programması Qırım yazıcı, çalğıcı ve kinorejisserlarınen tanış etip, ananeviy qırımtatar medeniyetiniñ yañı şekillerini açacaqlar.

Festival «Şahsiy deñizler, umumiy yalılar» şiarı altında keçirilecektir.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG