Link açıqlığı

Kyivde faaller Rusiye elçihanesiniñ yanında ukrain siyasiy mabuslarınıñ azat etilmesini talap ettiler


Cuma künü, aprel 8-de, Kyivdeki Rusiye Federatsiyasınıñ elçihanesi yanında qırımlı ukrain siyasiy mabusları Oleg Sentsov, Gennadiy Afanasyev, Aleksandr Kolçenkonıñ azat etilmesini talap ettiler. Aktsiya iştirakçilerinden biri Evelina Ganskayanıñ Qırım.Aqiqatqa bildirgenine köre, narazılıq aktsiyası cumaertesi künü, aprel 9-da, devam etecek.

«Aprel 9-da prokurorlar mahkemeniñ uzaqtan ceza çekmesi qararından şikâyet ettilermi-yoqmı belli olacaq. Yoq ise, üküm işke tüşürile. Böylece Afanasyev evine yaqın bir yerge avuştırılacaq», – dedi o.

Rusiyede mahküm etilgen ukrainler Qırımda terroristik areketlerniñ teşkil etilmesi boyunca cinaiy işniñ iştirakçileridir. Rejisser Oleg Sentsov ve faal Aleksandr Kolçenko 20 ve 10 yılğa qadar azatlıqtan marum qaldırıldı.

Gennadiy Afanasyev Rusiyeniñ Sıktıvkar şeerindeki 25 apishanesinde yata. Mart 9-da mahkeme Afanasyevni yaşağan Qırım yarımadasına yaqın bir apishanege avuştırmağa qarar aldı.

«Memorial» uquq qorçalayıcı teşkilâtı Afanasyev, Sentsov ve Kolçenkonı siyasiy mabus olaraq tanıdı.

Mart 10-da Ukraina Adalet nazirligi Rusiyege Oleg Sentsov, Yuriy Soloşenko, Aleksandr Kolçenko ve Gennadiy Afanasyevniñ Ukrainağa qaytarılmasınen bağlı talapnı yolladı. Ertesi künü Rusiye Adalet nazirligi işbu muracaat 30 kün içinde baqılacağını bildirdi.

Aprel 7-de belli oldı ki, Ukraina Adalet nazirligi Oleg Sentsov ve Aleksandr Kolçenkonıñ Ukrainağa berilmesinen bağlı talapnı Rusiyege tekrar yolladı.

XS
SM
MD
LG