Qarabağ zıddiyeti alanında taraflar «sessizlik rejimini» ilân ettiler, arbiyler elâk olğanlarnıñ cesedlerini qıdıracaqlar. Bunı Azerbaycan Mudafaa nazirligi ve Dağlıq Qarabağnıñ şimdiki akimiyeti bildirdiler.
Berilgen malümatqa köre, «sessizlik rejimi» aprel 8-de saat 15-ten saat 20-ge qadar devam etecek.
Esnasnı Qızıl Haç Halqara komiteti ve OSCE Minsk gruppası mahsus vekiliniñ alan yardımcıları idare eteler.
Ermenistanğa qoltutqan separatist regionı – Dağlıq Qarabağda – aprel 2-de gece vaziyet kerginleşti. Toplar, tank ve aviatsiya ile arbiy areketler başlandı. Birleşken Milletler Teşkilâtı aprel 4-te bildirdi ki, silâlı qarşılıqnıñ qurbanı 30 kişi oldı, 200 insan yaralandı.
Aprel 5-te Azerbaycan ve Ermenistan Dağlıq Qarabağla barışıq aqqında añlaştılar. Faqat ertesi künü zıddiyet tarafları bir-birini añlaşma bozulması ile qabaatlap, yañı qurbanlar aqqında bildirdiler.
Dağlıq Qarabağ Azerbaycannıñ sıñırlarına kirgen bir muhtariyet. Ealisiniñ ekseriyetini ermeniler teşkil ete, olar 1988-1994 seneleri cenkinden soñ mustaqillikni ilân etkenler, böylece Azerbaycan regionnı kontrol etemey. Baku regionnı Ermenistan işğal etti, dep tüşüne.
Dağlıq Qarabağnıñ sözde «mustaqilligini» dünyada iç bir memleket, şu cümleden Ermenistan da tanımay. Yerevan Azerbaycannıñ bu separatist regionına yardım ete.
Dağlıq Qarabağdaki zıddiyet neticesinde aman-aman 30 biñ kişi elâk oldı.
