Kreml kontrol etken Qırım içki siyaset, malümat ve bağ nazirligi üç tilde neşir etilgen «Qırım Anayasasınıñ» bedava tarqatılmasını ilân ete.
Nazirlikniñ matbuat hızmeti bildire ki, aktsiya Qırım Anayasası Kününe bağışlana, onıñ maqsadı – vatandaşlarnıñ uquq medeniyetini arttırmaqtır.
«Saat 11-den 12-ge qadar keçirilecek aktsiyada qırımlılarğa Anayasanıñ neşir etilgen 3000 nushası tarqatılacaq. Aktsiya Aqmescitte üç yerde keçirilecek: «Silpo» tükânı yanındaki meydanda, Puşkin/K.Marks soqaqlarınıñ çaprazında, Glavpoçtampt durağı», – dep aytıla haberde.
«Qırım Anayasası» Moskvağa boysunğan yarımadanıñ parlamenti tarafından 2014 senesi aprel 11-de qabul etilgen edi. Onıñ esas maddeleri Rusiye Anayasasına beñzep kete.
Vesiqa Qırımda üç devlet tilini belgiley – ukraince, qırımtatarca ve rusça ve 2014 senesi aprel 12-de «Krımskiye izvestiya» gazetasında derc olunğan edi.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
