Ukrain yırcısı Jamalanıñ «Eurovision-2016» yarışında iştirak etmesi Avropanı Qırımnıñ tamır halqı ile tanış etecek eñ yahşı bağ kampaniyası ola, dep ayttı Ukraina haber siyaseti naziriniñ Qırım meselelerinden mesleatçısı Emine Ceppar.
Bunı Ceppar Ukraina Haber siyaseti nazirligi teşkil etken Jamalanıñ çetel jurnalistleri ile körüşüvinde bildirdi, dep haber ete nazirlikniñ matbuat hızmeti.
«Yarış seyircileriniñ sayısı Avropa boyunca yarım milliard insannı teşkil ete bile. Sanada qırımtatar halqınıñ tarihına dair yırnıñ yanğıraması insanlarnıñ qırımtatarlar aqqında malümat alacaqlarınıñ bir kefilidir, bazıları ilk sefer eşitecekler. Bu qırımtatarlarnıñ dünya derecesinde eñ güzel bağ kampaniyasıdır», – dep qayd etti Emine Ceppar.
Ukrain yırcısı Jamala «1944» yırını jurnalistlerge siyasetnen bağlı olmağan bir yır olaraq tanıttı.
Jamala «Eurovision» ukrain milliy saylavında seyircilerden 142 biñ rey (reylerniñ 37,77%) qazanıp ğalip çıqtı.
«Eurovisionnıñ» yarım finalı Stockholmde mayıs 10 ve 12 künleri keçirilecek, yarış finalı ise 2016 senesi mayıs 14-de olacaq.
