«Qırım diasporası» cemaat teşkilâtı memleket içinde köçip kelgenler içün ekologik yerleşme qurucılığı planları aqqında bildire. Teşkilâtnıñ matbuat hızmeti bergen malümatqa köre, Kyiv vilâyetiniñ akimiyeti Vışgorod rayonınıñ Abramovka köyü yanındaki yerni teklif etti.
«Sekiz ay devamında «Qırım diasporasınıñ» faalleri memleket içinde köçip kelgenler içün Kyiv vilâyetinde ekologik yerleşmeniñ qurucılıq leyhası üzerinde çalıştılar. Şimdige qadar köçip kelgen 439 qoranta leyhağa qoşulmağa istegenini bildirdi», – dep aytıla haberde.
Leyha aprel 12-de Kyiv vilâyeti devlet memuriyetiniñ binasında muzakere etilecektir. «Qırım diasporasınıñ» malümatına köre, toplaşuvda ekologik yerleşmeniñ maqsadı, yerli infrastrukturanıñ hususiyetleri, vesiqalarnı resmiyleştirüv qaideleri, leyha çerçivesinde halqara yardımnı elde etüv imkânları tarif etilecek.
Ukraina içtimaiy siyaset nazirliginiñ malümatına köre, 2016 senesi aprel 4 kününe qadar Rusiye işğal etken Qırımdan ve Donbasstan köçip kelgen insanlarnıñ sayısı 1 mln 760 biñ 972 kişini teşkil etti.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
