Çetel kütleviy haber vastalarında Qırım mevzusı aydınlatılsa, işğalde yaşağan qırımtatarlar telükege oğramazlar. Böyle bir fikirni Ukraina haber siyaseti naziriniñ Qırım meselelerinden mesleatçısı Emine Ceppar seslendirdi.
«Ukraina vatanperveri Qırımda işğalcilerniñ qurbanı olmaq telükesi altında yaşağanda, siyasiy repressiya ve basqılar vaziyetinde, haber alternativası pek müim. Rusiye kontrol etken matbuat vastaları «rus Qırımında amanlıq ve halqlar aynı seviyede olğanını» köstereler, haber kerçegini bozalar. Bu sebepten işğalde yaşağan qırımtatarlar ve ukrainlerniñ havfsızlığı içün kerçek malümatnıñ yetkizilmesi müim ola», – dep qayd etti Emine Ceppar.
Aprel 6-da qırımtatar halqınıñ milliy lideri Mustafa Cemilev Danimarka, Poloniya, Türkiye jurnalistlerinen körüşti. Haber siyaseti nazirligi teklif etken körüşüvniñ mevzusı Rusiye işğalinden soñ Qırım yarımadasındaki vaziyet oldı.
Emine Ceppar qayd etti ki, Qırım ve qırımtatarlar mevzusı yarımadanı azat etüv esnasında nazirlikniñ esas yönelişlerinden biri olacaq.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
