Link açıqlığı

Meclis yasaqlanması mahkemesinde Aqmescit regional meclisiniñ reisini esnasqa celp etmege izin berilmedi


Qırımda Qırımtatar Milliy Meclisiniñ qapatılması davası mahkemesinde Aqmescit regional meclisiniñ reisi Lemmar Yunusovnı esnasqa celp etmege ruhset berilmedi. Böyle bir qarar mahkemeciler kollegiyası tarafından Meclis imayesiniñ bunıñnen bağlı muracaatından soñ qabul etildi, dep haber ete Qırım.Aqiqat.

Esnasnıñ iştirakçilerinden biri bergen malümatına köre, mahkeme Qırımtatar Milliy Meclisiniñ azası Emine Avamilevağa mahkemede Nariman Celâl olmağanda onı temsil etmege izin berdi.

Mahkeme toplaşuvında bir saat teneffüs ilân etildi.

Aprel 7-de Aqmescitte Qırımnıñ Rusiye prokurorınıñ Meclis faaliyetiniñ yasaqlanması davası baqıla. Esnas Qırımnıñ Rusiye prokurorı Natalya Poklonskayanıñ teşebbüsi ile başladı. Meclis reberleri prokuraturanıñ talapları yerine ketirilecegini tüşüneler.

Aprel başında Rusiyege boysunğan Qırım ükümetiniñ Milletlerara munasebetler ve sürgün olunğan grajdanlarnıñ işleri boyunca Devlet komitetiniñ reisi Zaur Smirnov Qırımtatar Milliy Meclisiniñ yasaqlanması davası mahkemesinde onıñ komiteti qabaat tarafını tutacağını bildirdi.

Mahkeme bu davanı mart 17-de baqqan edi. Toplaşuvnıñ büyük qısmı davacı ve davalınıñ memuriy davağa olğan munasebetleriniñ ifadelemelerinden ibaret oldı.

Ukraina Tışqı işler nazirligi Meclis faaliyetini yasaq etecek olğan Rusiye akimiyetiniñ areketlerine qarşı narazılıq bildirdi. Birleşken Milletler Teşkilâtı Rusiye Federatsiyasını Qırımda Qırımtatar Milliy Meclisiniñ yasaq etilmesine yol bermemege çağırdı. Avropa birligi de Meclis faaliyetini yasaq etmek niyetlerinden qasevetlengenini bildirdi.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG