Link açıqlığı

Aqmescit akimiyeti Qırımnıñ eñ büyük naqliyat müessiselerinden biri olğan «SimSitiTrans» şirketi ile işbirligini toqtatqanını bildire, dep ayttı Rusiye kontrol etken Aqmescit memuriyetiniñ yolbaşçısı Gennadiy Baharev.

Qırım matbuat vastalarınıñ malümatına köre, Baharev cemaatçılıqnen körüşip, mezkür qararnıñ bir qaç sebebi bar olğanını qayd etti. Olardan biri, onıñ bildirgenine köre, şirket reberliginiñ Qırım qamaçavı aktsiyasınıñ koordinatorı Lenur İslâmov ile alâqaları ola.

«SimSitiTrans» Aqmescitte çalışmaycaq. İş standartlarına şeer yollarında riayet etilmedi. Eski tehnika, añlaşma şartları bozula, aydavcılar qaba yanaşalar. Qırımlılarğa qoltutamız: yarımadanı blok etken kişi sayemizde para qazanıp, onı qamaçavğ sarf etse olmaz. Mantıqsız bir şey», – dep tekrarlay Baharevniñ aytqanlarını «RİA Krım».

Şirket reberligi ve Lenur İslâmov Aqmescit memuriyeti reisiniñ aytqanlarını şimdilik izaatlamadılar.

2016 senesi fevral 1-de belgisiz şahıslar «SimSitiTrans» naqliyat şirketiniñ işini blok etken edi. Buña müessiseni qapatmaq içün basqınıñ devamı dep ayttılar.

Rusiye kontrol etken Qırım prokurorı Natalya Poklonskaya «SimSitiTrans» işini kimse blok etmegenini, fevral 1-de şirkette bir de bir taqiqat areketi olmağanını bildirdi. Onıñ aytqanına köre, uquq qoruyıcılar müessisege kelip, evelden qayd etilgen bozuvlarnı haber etecek ediler.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG