Ukraina Baş prokuraturası 2016 senesi başından başlap Rusiye işğal etken Qırımda insan aqları ve azatlığınıñ bozulmasından sebep başlatılğan 60 cinaiy taqiqat aqqında bildire.
Bunı prokuraturanıñ matbuat hızmeti bildire.
Ukraina Baş prokuraturası bildire ki, delillerni toplamaq içün tedbirler alına.
«Aynı vaqıtta sözde Qırım Cumhuriyeti prokuraturası ve vaqtınca işğal etilgen Ukraina toprağında qanunsız qurulğan diger organlarnıñ hadimleri yapqan areketlerden añlaşıla ki, Ukrainağa qoltutqan ve Qırım işğalini tenqit etken şahıslarğa basqı yapıla ve olarnı taqip eteler», – dep aytıla haberde.
Ukraina prokuraturası qayd ete ki, «Rusiye Federatsiyasınıñ repressiv siyaseti neticesinde Qırımnıñ tamır halqı – qırımtatarlar – zarar köre».
«Qırımtatar Milliy Meclisi teklif etken er angi barışıq toplaşuvları yasaq etile, liderler ve fallerniñ binalarında sözde uquq qoruyıcı olğanlar qanunsız tintüv keçire ve siyasiy sebeplerge esaslanıp adamlarnı yaqalaylar», – dep qayd ete prokuratura.
Halqara teşkilâtlar, şu cümleden Avropa parlamenti Rusiye işğal etken Qırımda insan aqları bozulğanını bildirip, Moskvanı bu cinayetlerni toqtatmağa çağırğan ediler. Rusiyege boysunğan Qırım akimiyeti bunı «abartılğan bir malümat» dep adlay.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
