Link açıqlığı

Saatnıñ esas haberi

Avropa parlamentinde Qırım ve Donbass aqqında esabatlar taqdim etildi


Aprel 5-te olıp keçken Avropa parlamentindeki konferentsiyada «Ukraina Şarqındaki Rusiye arbiy cinayetleri» ve «Kremlniñ 28 reinesi» esabatları taqdim etildi.

Maruzalar uquq qorçalayıcılar, Avropa birligindeki ukrain missiyası ve Avropa parlamenti deputatlarınıñ birlikte yapqan işiniñ neticesi ola. Mütehassıslar ilk menbalardan malümat aldı ve şaatlarnen laf ettiler.

Donbasstaki vaziyetni Brüsselde uquq qorçalayıcılarnen beraber, zarar körgenler de tarif ettiler.

«Esabatnıñ özü şaşırta. Azap, öldürüv, zorbalıqlarnen bağlı esabat. Bugün aqşam mında malümat bergen qadın eki Britaniya jurnalisti tarafından fotoresimge alınmasa edi, mında olmaz edi. Olar böyle etip ayatını qurtardılar», – dep ayta Avropa parlamentiniñ deputatı Mark Demesmaker.

Onıñ aytqanına köre, böyle cinayetler cezasız qalmaz. Demesmakerniñ fikirince, taqdim etilgen maruzalar Halqara ceza mahkemesiniñ taqiqatı içün temel ola bile.

«Kremlniñ 28 reinesi» esabatında uquq qorçalayıcılar Rusiyede ve işğal etilgen Qırımda siyasiy sebeplerden apiske alınğan ukrainlerniñ ikâyelerini topladılar.

Ukraina vatandaşı Nadejda Savçenkodan ğayrı, Rusiye apishanelerinde onlarnen Ukraina vatandaşı yatmaqta.

«Olarnıñ bir qabaatı bar – kelişmegen bir vaqıtta kelişmegen bir yerge tüştiler», – dep ayta «Açıq dialog» fondunıñ reisi Lüdmila Kozlovskaya. – Apiske alınğanlardan biri – Ukrainada yaşağan qoranta azalarınen bağ tutqan 74 yaşında bir er kişi. Onıñ qabaatı budır. Onı «Yañı GULAGğa» yollağanlar».

Uquq qorçalayıcılar qayd eteler ki, apiske alınğan Ukraina vatandaşlarını sıqıştıralar, olarğa tibbiy ve adliy yardım kösterilmey. Tuvğanlarınen bağ tutmağa bile imkân bermeyler.

Avropa parlamentinde keçirilgen diñlevleden soñ eki esabat da bir sıra Avropa devletiniñ milliy parlamentinde taqdim etilecek. Gaagadaki Halqara ceza mahkemesine maruzalar da berilecek.

2014 senesi mart ayında Rusiye Qırımnı işğal etti. Kyiv ve Ğarp bunı tanımayıp, yarımadanı ukrain toprağı sayalar.

Ukraina ve Ğarp Rusiyeni Donbasstaki separatistlerge qoltutqanınen qabaatlaylar. Moskva bunı red etip, Donbassta Rusiye arbiyleri degil, «göñülliler» bardır, dep bildire.

XS
SM
MD
LG