Bağçasaray rayonı devlet memuriyetiniñ yolbaşçısı Refat Derdarov Hanlar sarayında yerleşken şiş kebap noqtasından sebep işten boşatıldı, dep bildirdi Moskvağa boysunğan Qırım yolbaşçısı Sergey Aksenov aprel 5-te Kefede keçirilgen Qırımnıñ Rusiye ükümeti toplaşuvında, dep haber ete Qırım.Aqiqat.
«Qavehane qapatılacaq dep vade etken Derdarov Refat Yakuboviç endi çalışmay. O, ariza yazdı, şura (Bağçasaray şurası – QA) eñ yaqın vaqıtta qarar (istifa qararı – QA) alacaq», – dedi Aksenov.
«Qırımtatar halqınıñ liderlerinden biri İsmail Gasprinskiyniñ mezarında şiş kebap qavehanesi çalışa. Livadiya sarayında kiriş qarşısında qavehane olsa, Hanlar sarayında şiş kebap noqtası olsa, arqadaşlar, bilmeyim artıq! Özüm narazılıq aktsiyasına çıqmağa mecbur olacam», – dedi Aksenov.
O, taqiqat keçirip, qabaatlılarnı cezalamağa talap etti.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
