Adliyeci Emil Kürbedinov Rusiye Federal havfsızlıq hızmetiniñ Aqmescitte «Hizb ut-Tahrir» alâqaları ile qabaatlanğan dört musulmannıñ mahkemesini qapalı şekilde keçirmege tırışqanını bildire. Aprel 5-te olarnıñ apis cezaları uzatılmaq kerek.
«Haber ile küreş. FSB terrorizm ile qabaatlanğan dört musulmannıñ mahkemesini qapalı şekilde keçirmelerini istey. SİZOda apis cezaları uzatıla bile», – dep yazdı Emil Kürbedinov Facebookta.
Aqmescitte salı künü Emir-Üsein Kuku, Enver Bekirov, Müslim Aliyev ve Vadim Siruknıñ apis cezalarını uzatuv mahkemesi keçirilecek.
Qırımda fevral 11-de qırımtatarlarnıñ evlerinde tintüvler olıp keçti. 12 insan yaqalandı, sorğulardan soñ çoqusı azat etildi. Qırımnıñ Rusiye prokurorı Natalya Poklonskaya «Hizb ut-Tahrir» terroristik teşkilâtınıñ» faaliyeti aqqında cinaiy iş boyunca 4 insan yaqalanğanını bildirdi. Fevral 12-de yaqalanğan dört kişi apiske alındı. O künü daa tahminen on tintüv keçirildi. Qırımtatar Milliy Meclisi buña qırımtatarlarğa qarşı repressiyalarnıñ yañı dalğası dep ayta. Ukraina Tış işler nazirligi fevral 12-de narazılıq bildirip, Rusiyege qarşı basqını arttırmağa çağırdı.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
