Ukraina şarqındaki eki yıl devam etken zıddiyetten sebep bir buçuq million ukrain aç otura, dep bildire Birleşken Milletler Teşkilâtı.
Dünya aşayt programmasınıñ (DAP) malümatına köre, olardan 300 biñ aşayt mahsulatsız qalıp, acele yardımğa muhtac. Eñ zor vaziyet Lugansk vilâyetiniñ Ukraina ükümeti nezaret etmegen ayrı rayonlarında ve sıñırdaki mesken noqtalarında üküm sürmekte, dep aytıla haberde.
Dünya aşayt programması er ay aman-aman 270 biñ insanğa yardım etmek niyetinde. BMT zıddiyetniñ er tarafını ealige gumanitar yardım alması içün mania olmamağa çağıra.
«Eki yıllıq zorbalıq, ateş, qorqu yaşayışı Ukraina şarqındaki biñlernen insannıñ ayatında silinmez bir iz qaldırdı», – dep ayttı BMT DAP Ukrainadaki vekili Cankarlo Stopponi.
«Zıddiyet devam ete ve bizler bu adamlarğa tezce yetişmek içün elimizden kelgenini yapmaq kerekmiz. Zıddiyetniñ er tarafını aşayt mahsulatqa muhtac olğan insanlarğa tolu ve maniasız gumanitar yardım berilmesini teminlemege çağıramız», – dep qoştı DAP vekili.
2014 senesi noyabr ayından başlap BMT Dünya aşayt programması Ukraina şarqınıñ yarım million sakinine acele yardım yolladı. 370 biñ insan er ay aşayt mahsulatını ve 180 biñ kişi bazarlarda mal almaq içün vauçer ala.
Ukraina şarqındaki silâlı zıddiyet 2014 senesi aprel ayından berli devam ete. Ukraina akimiyeti Rusiyege qoltutqan separatistlerge qarşı terrorizm ile küreş tedbirleriniñ keçirilmesini ilân etti. Rusiye akimiyeti zıddiyette öz askerleriniñ iştirak etmesini red ete. Moskva Donbassta Rusiye «göñüllileri» bar olğanını bildire.
BMT malümatına köre, zıddiyet devamında doquz biñden ziyade insan elâk oldı.
