Link açıqlığı

Saatnıñ esas haberi

Dağlıq Qarabağda gece ateş toqtamadı – zıddiyet tarafları


Ermenistan Mudafaa nazirligi bildirdi ki, Azerbaycan ordusı gece Ermenistanğa qoltutqan separatist regionı Dağlıq Qarabağdaki uruşlarda «Smerç» sistemasını qullandı.

Berilgen malümatqa köre, sıñır ağı boyunca Dağlıq Qarabağnıñ mesken yerleri ve ordu noqtalarına ateş açıldı. Azerbaycan tarafı uçucısız apparatlarnı qullana, olardan biri Qarabağ tarafından tüşürildi, dep aytıla Ermenistan Mudafaa nazirliginde.

Ermenistan Mudafaa nazirliginiñ matbuat hızmeti bildire ki, on altı Azerbaycan arbiyi eki kün içinde Dağlıq Qarabağ zıddiyeti alanındaki uruşlarda elâk oldı.

Azerbaycan Mudafaa nazirliginiñ malümatna köre, «gece cebede kergin vaziyet üküm sürgen edi». «Ermeni tarafı sıñırğa yaqın mesken yerlerge ateş açmağa devam ete», – dep bildire nazirlik.

Aprel 2-de, cumaertesine keçer gecesi, Dağlıq Qarbağdaki vaziyet kerginleşti. Ermenistan ve Azerbaycan tarafı bir-birini ağır silâ qullanmasınen ücüm etkenleri ile qabaatladı. Ermenistan prezidenti Serj Sargsân 18 ermeni askeriniñ vefat etkenini aydınlattı. Azerbaycan akimiyeti 12 asker ve bir vatandaşnıñ elâk olğanını bildirdi. Azerbaycannıñ Ermenistanğa qoltutqan separatist regionı Dağlıq Qarabağda eki vatandaş, biri 12 yaşında oğlançıq elâk olğanı bildirildi.

Aprel 3-te Azerbaycan Mudafaa nazirligi Baku Qarabağ zıddiyeti alanında arbiy areketlerni toqtatqanını ilân etti. Ealiniñ ekseriyeti ermeni olğan Dağlıq Qarabağ 1991 senesi Azerbaycan terkibinden çıqqanını ilân etti. Bundan sebep silâlı zıddiyet yüz berdi, bunıñ neticesinde Azerbaycan topraqnı nezaret etemey, 30 biñden ziyade insan elâk oldı. Ermenilerden ibaret quveter Dağlıq Qarabağnen beraber bu region etrafındaki yüksek noqtalarnı nezaret etmekte. Böylece, Azerbaycan bu devletke ait olğan topraqnıñ aman-aman beşinci qısmını kontrol etmey.

XS
SM
MD
LG