Link açıqlığı

Kyivdeki 165 nomeralı mektepniñ müdiri Lüdmila Vaşkulat milliy qırımtatar sınıfını açmaq ğayesine qoltuttı. Mektepte Qırımtatar Milliy Meclisiniñ reisi Refat Çubarovnıñ iştiraki ile ana-babalar toplaşuvı olıp keçti, dep haber ete QHA agentligi.

«Bu mektepte çoq medeniyetlik ğayesi yaşamaqta, 2011 senesi medeniy ve gumanitar yönelişlerde inkişaf olmasını belgilegen UNESCO programmasınıñ ortaq azası oldıq. Talebeler Ukrainanıñ çeşit regionlarınen beraber, diger Avropa memleketleriniñ regionlarını da ögreneler, böylece milliy sınıfnıñ açılması mantıqlı bir adım olacaq», – dep ayttı mektep müdiri.

Çubarov vaqıtnı coymayıp, teşkiliy işlerge başlamağa teklif etti. O, yañı oquv yılı başlamasına qadar sınıf azır olsun istey.

«Birinciden, maña köre, qanun, teşkiliy ve maddiy taraftan balalarımız içün farqlı ögrenüv şekillerini azırlaycaq bir qaç adamnı saylamaq kerek. Er kes razı olacaq bir şekilni saylasañız, onı yerine ketirmege başlaycaqmız», – dep ayttı Çubarov körüşüvde.

Rusiye Qırımnı işğal etken soñ yarımada sakinleri, şu cümleden qırımtatarlar, onı terk etip, esas Ukrainağa köçmege başladılar. Qırımda milliy sınıflarnıñ sayısı ve qırımtatar tili dersleri eksildi.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG