Dağlıq Qarabağdaki zıddiyet tarafları Azerbaycannıñ Ermenistanğa qoltutqan separatist regionında arbiy areketler devam etkenini bildireler.
Azerbaycan Mudafaa nazirligi saba bergen malümatında soñki kün içinde ermeni tarafı barışıqnı 121 kere bozdı, dep bildire. Bu malümatqa köre, ermeni quvetleri 60, 82 ve 120 millimetr kalibrli minaatıcılarnı qullana. Azerbaycan arbiyleri cevap olaraq 125 kere ateş açqanını bildireler.
Ermenistan Mudafaa nazirliginiñ vekili Artsruni Ovanesân Facebook saifesinde «Dağlıq Qarabağ mudafaa ordusınıñ» beyanatını aydınlata. Oña binaen, aprel 4-te gece Azerbaycan tarafı ög noqtaları ve ermeni mesken noqtalarına minaatıcı ve toplardan ateş açmağa devam etti. Bu beyanatqa köre, yerli saatke köre saat 7-de cenüp-şarq ve şimal-şarq yönelişlerinde raketalardan ateş açıldı.
Aprel 2-de, cumaertesine keçer gecesi, Dağlıq Qarbağdaki vaziyet kerginleşti. Ermenistan ve Azerbaycan tarafı bir-birini ağır silâ qullanmasınen ücüm etkenleri ile qabaatladı. Ermenistan prezidenti Serj Sargsân 18 ermeni askeriniñ vefat etkenini aydınlattı. Azerbaycan akimiyeti 12 asker ve bir vatandaşnıñ elâk olğanını bildirdi. Azerbaycannıñ Ermenistanğa qoltutqan separatist regionı Dağlıq Qarabağda eki vatandaş, biri 12 yaşında oğlançıq elâk olğanı bildirildi.
Aprel 3-te Azerbaycan Mudafaa nazirligi Baku Qarabağ zıddiyeti alanında arbiy areketlerni toqtatqanını ilân etti. Ealiniñ ekseriyeti ermeni olğan Dağlıq Qarabağ 1991 senesi Azerbaycan terkibinden çıqqanını ilân etti. Bundan sebep silâlı zıddiyet yüz berdi, bunıñ neticesinde Azerbaycan topraqnı nezaret etemey, 30 biñden ziyade insan elâk oldı. Ermenilerden ibaret quveter Dağlıq Qarabağnen beraber bu region etrafındaki yüksek noqtalarnı nezaret etmekte. Böylece, Azerbaycan bu devletke ait olğan topraqnıñ aman-aman beşinci qısmını kontrol etmey.
