Link açıqlığı

Saatnıñ esas haberi

Meclis milliy cemiyetlerniñ Felemenk cemaatına yollağan referendum muracaatına qoltuttı


Qırımtatar Milliy Meclisi milliy cemiyet yolbaşçılarınıñ Felemenk cemaatına yollağan aprel 6-da referendumda Ukraina ve Avropa birligi arasında assotsiatsiya añlaşmasına qoltutmaq muracaatına qoltuttı.

Bunı Ukraina milliy cemiyetler Kongressi Qırım.Aqiqatqa bildirdi.

«Al-azırda Ukraina tarihınıñ eñ dramatik zamanını yaşamaqta. Bir sıra etnodin grupplardan ibaret olğan bir halq olaraq medeniy bir saylav yaptıq – yalıñız coğrafik degil, Avropa medeniyetiniñ kerçek bir parçası olmaq, totalitar ve imperik keçmiş aqibetlerinden qurtalıp, umumiy qıymetler esasında kelecegini qurğan serbest halqlar qorantasına kirmek isteymiz», – dep aytıla Kongressniñ muracaatında.

Vesiqa müellifleri qayd etkenine köre, Ukraina bunıñ içün büyük bir bedel ödedi – «istilâ kördik, toprağımıznıñ bir qısmı işğal altında, memleketimizge qarşı gibrid cenki kete, amma azatlıq ve mustaqillik aqqımıznı qorçalaycaqmız ve, bizim fikirimizce, öz memleketinde asırlarnen serbest olmaq içün küreşken Felemenk sakinleri bizni añlap qoltutarlar».

Muracaatta qayd etile ki, Assotsiatsiya añlaşması – birinci adımdır, Avropa toplulığınıñ Ukrainanıñ azatlıqqa ve demokratiyağa ıntıluvına qoltutmağa azır olğanınıñ bir işaretidir.

«Felemenk vatandaşları, aprel 6-da referendumğa kelip, çoq milletli memleketimizniñ Avropağa yaqınlaşmasına «Ebet» demege rica etemiz. Balalarımız bu maqsatqa irişmek içün qan töke ve can bereler. Referendumda qoltutmağa çağıramız», – dep qayd etile muracaatta.

Felemenk, Avropa birliginiñ diger memleket azaları kibi, Ukraina ve AB assotsiatsiya añlaşmasını tasdıqladı. Amma, yaqında qabul etilgen qanunğa binaen, aprel 6-da memlekette bu tasdıqnı ğayrıdan baqmaq içün mesleat referendumı keçirilecektir. Felemenk ve Avropa birligi siyasetçileri memleket saylayıcılarını añlaşma tasdıqlanmasına qoltutmağa çağırdılar.

XS
SM
MD
LG