Azerbaycannıñ Ermenistanğa qoltutqan separatist regionı Dağlıq Qarabağ Mudafaa nazirligi Azerbaycan tarafından açılğan ateş neticesinde bir bala can bergenini ve eki kişi yaralanğanını bildire.
Berilgen malümatqa köre, arbiylernen beraber mesken yerlerge de ateş açıldı.
Dağlıq Qarabağ Mudafaa nazirligi bildirgenine köre, cumaertesine keçer gecesi Azerbaycan arbiyleri Qarabağ zıddiyeti alanında birden bir qaç yönelişte ücüm etkenler. Ermenistan Mudafaa nazirligi ermeni tarafından cevap berilgenini, ve arbiy areketler devam etkenini bildirdi.
Azerbaycan Mudafaa nazirliginiñ malümatına köre, Ermenistan silâlı quvetleri top, minaatıcı ve diger silânı qullanıp, Azerbaycan ordusına ateş açtılar.
Azerbaycan nazirliginiñ bildirgenine köre, zıddiyet alanına yaqın olğan bir sıra mesken kvartalğa da ateş açıldı, bu sebepten tedbir almağa qarar alındı.
Baku Ermenistan arbiyleri Azerbaycan Arbiy-Ava quvetleriniñ uçağını tüşürdi kibi malümatnı red ete.
Aprel 1-de AQŞ prezident muavini Joe Biden Ermenistan ve Azerbaycan prezidentlerinen ayrı körüşüv keçirip, Dağlıq Qarabağdaki zıddiyetni barışıq şekilde al etmelerine çağırdı.
Ealiniñ ekseriyeti ermeni olğan Dağlıq Qarabağ 1991 senesi Azerbaycan terkibinden çıqqanını ilân etti. Bundan sebep silâlı zıddiyet yüz berdi, bunıñ neticesinde Azerbaycan topraqnı nezaret etemey.
