Qırımdaki Ekstremizm ile küreş merkezinden («E» merkezi – Rusiye İçki işler nazirliginiñ bölügi) aprel 1-de Colman (Pionerskoye) köyünde yaqalanğan musulmanlar dört saatten soñ azat etildi. Yaqalanğanlarnıñ DNK talili ve parmaq izleri alındı. Bunı Qırım adliyecisi Emil Kürbedinov Facebookta bildirdi.
«Tünevin yaqalanğan Qırım musulmanları dört saatten soñ «E» merkezinden azat ettiler – olarnıñ parmaq izleri ve DNK talili alındı», – dep haber ete adliyeci.
Aprel 1-de aqşam Qırımnıñ Colman köyündeki «Bagdad» qavehanesinde 35 musulman yaqalandı. Emil Kürbedinovnıñ bildirgenine köre, yaqalanğanlar – qırımtatarlar, olarnı Ekstremizm ile küreş merkezine «profilaktik teşkerüv» içün alıp ketken ekenler. Qavehanede bulunğan slavân sıfatlı insanlarnı birden yiberdiler, dep ayttı adliyeci.
Diger mustaqil menbalarnıñ malümatı şimdilik yoq, Qırımnıñ uquq qoruyıcı organları resmiy bir şey bildirmedi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
