Link açıqlığı

Kyivde qırımtatarlarnı añlatqan «Yel toqtağanda» filmi kösterildi


Kyivde cuma künü, aprel 1-de, Kino evinde Poloniya rejisseri Anjela Astrid Gabrielniñ «Yel toqtağanda» filminiñ premyeradan aldın numayışı olıp keçti. Film qırımtatarlarnıñ yaşayışını añlata.

Film qaramanları – adiy qırımtatar qorantaları, dep haber ete Qırım.Aqiqat mühbiri.

«İnsanlar, aralarında olğan munasebetler, sevgi, bir qaç qorantanı añlatqan universal bir ikâye. Qırımtatarlar güzel ve musafirperver olğanını kösterdik», – dep ayttı film rejisseri Anjela Astrid Gabriel Qırım.Aqiqatqa.

2014 senesi mayısta filmni çıqarmağa başladılar, 2015 senesi baarinde filmniñ çekimleri yekünlendi. Filmniñ daa bir rejisseri Taras Dronânıñ aytqanına köre, filmni çıqarğan taqım aman-aman bütün Qırım yarımadasını dolaştı.

Levha mayıs 18-de Kyiv ve Varşavada taqdim etilecek. Qırımtatar halqınıñ lideri Mustafa Cemilev qapalı taqdim merasimine davet etildi.

«Varşava ve Kyiv arasında telemost olacaq. Kyivde ekinci rejisser Taras olacaq, Varşavada ise Amila olacaq», – dep qoştı Anjela Astrid Gabriel.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG